SERIKALI SASA YAWABANA MAWAKALA WA HUDUMA ZA AJIRA NCHINI

WIZARA ya kazi na ajira kupitia  waziri wake Gaudentia   Kabaka(pichani)   amewataka  wakala  wote  wa  huduma  za  ajira  nchini  kuwasilisha  barua  za  maombi    za  usajili  wa  uwakala  kwa  kamishina  wa  kazi .

Mwandishi  wa mtandao  huu wa www.matukiodaima.com  kutoka Dar ,Kenneth John anaripoti kuwa ,Tamko  hili  limekuja  baada   ya  wizara  hiyo,  kufanya  utafiti  na  kubaini  kuwa  utaratibu  wa   kukodisha  wafanyakazi,  unaofanywa  na   baadhi  ya  wakala  binafsi  wa  huduma  za  ajira  ni  kinyume  cha  sheria  za  huduma  za  ajira  Na  9  ya  mwaka  1999  (sura  243  kama  ilivyorejewa  mwaka  2002)

Aidha  mheshimiwa  Kabaka  alisema  kuwa,  kwa  mujibu  wa   kifungu  4  cha  sheria  hiyo ,majukumu  ya  msingi  ya  wakala  wa  huduma  za   ajira,  ni  kuwaandaa  na  kuwaunganisha  watafuta  kazi  na  waajiri  kwa  kutoa  mafunzo  na  ushauri  elekezi  kwa  watafuta  kazi,kutafuta  fursa  za  ajira  na  kutoa  taarifa  za  soko  la  ajira, Hivyo  mheshimiwa  Kabaka  amesema  kuwa  mawakala  hawapaswi  kuwa  waajiri  wa  wafanyakazi  waliowatafutia  kazi  kwa  niaba  ya  waajiri  wengine.

Sambamba  na  hayo  mheshiwa  Kabaka  alisema  kuwa  uchunguzi  walioufanya  ulibaini  kwamba,  utaratibu  huu  ni  ujanja  unaotumiwa  na  baadhi  ya  waajiri,  pamoja  na  mawakala    kwa  lengo  la  kukwepa  kodi  na  kujipatia  faida  kwa  njia  ya  kutotoa  haki  za  msingi  za  wafanyakazi  kwa  mujibu  wa  sheria  za  kazi.Mheshimiwa  Kabaka  aliendelea  kusema  kuwa  baadhi  ya  makampuni  yanayokodisha  wafanyakazi  yamefanyiwa  uhakiki  na  TRA  na  kubainika  kukwepa  kodi  ya  mapato  ya  ajira  (PAYE)  na  kodi   ya  mapato  ya  kampuni  kinyume  na  kifungu  cha  7  cha  sheria  ya  kodi  ya  mapato  ya  mwaka  2004  (sura  332  kama  ilivyorejewa  mwaka  2008)

Pamoja  na  hayo  mheshiwa  Kabaka  alisema  kuwa,  pia  uchunguzi   ulibaini  athari  mbalimbali  kwa  wafanyakazi  wanaoajiriwa  kwa  utaratibu  wa  huduma  hizo  za  mawakala,  ikiwa   ni  pamoja  na  wafanyakazi  kukosa  haki  ya  hifadhi  ya  jamii  kama  vile  likizo  ya  uzazi  na  matibabu  ambapo  ni  kinyume  na  sheria  mbalimbali  za  mifuko  ya  hifadhi  ya  jamii,Uwepo  wa  ubaguzi  katika  malipo  ya  mishahara  kwa  kazi  ya  aina  moja ,kukosa  fursa  ya  kujiendeleza  kielimu  na  mafunzo,kukosekana  kwa  usalama  na  uhakika  wa  ajira  pamoja  na  wafanyakazi  kulipwa  mishahara  ya  kima  cha  chini  kinyume   na  sekta  wanayofanyia  kazi.

Vile  vile  kutokana  na  hayo  yote  wizara  imeamua  kusitisha  mara  moja  utaratibu  wa  mawakala  kuwaajiri   wafanyakazi , wanaowatafutia  kazi.

Aidha , mawakala   na  kampuni  husika  waliopo  katika  utaratibu  huo  kwa  sasa  wanapaswa  kuwahamisha  wafanyakazi  waliokodishwa  kutoka  kwa  wakala  kwenda  kwa  kampuni  husika .

Hivyo  waziri  Kabaka  amewaagiza  waajiri   na  mawakala  kukamilisha  zoezi  hilo  ndani  ya  kipindi  cha  mwezi   mmoja  na  kuhakikisha  wanawasilisha  taarifa  za  utekelezaji  kwa   katibu  mkuu  wizara  ya  kazi  na  ajira  kabla  au  ifiakapo  February  28, 2014

Halikadharika  waziri  Kabaka  ameelekeza  wakala  wa  huduma  za  ajira  nchini , kuwa  watapaswa  kuwasilisha  barua  za  maombi  ya  usajili  wa  uwakala  kwa  kamishina  wa  kazi ,ili  waweze  kufanya  shughuli  za  uwakala  wa  huduma  za  ajira  kisheria, na  maombi  hayo   ameagiza  yawasilishwe  ndani  ya  kipindi  cha  mwezi  mmoja  tangu  kutolewa  kwa  tangazo  hili.Kabaka  aliendelea  kusema  kuwa   baada  ya  muda  huo,  wakala  ambaye  hatokuwa  na  kibali  cha  kamishina  wa  kazi  hataruhusiwa  kuendesha  shughuli  za  huduma  za  ajira  nchini. Na  kwa  wale   mawakala  watakaopata  leseni  ya  kamishina  wa  kazi , watatangazwa  ili  watambulike  na  umma.