TANROADS IRINGA YAJA NA MKAKATI YA KUKOMESHA RUSHWA ENEO LA MZANI WA WENDA

Meneja  wa wakala  wa barabara mkoa  wa Iringa Paul Lyakurwa akiwasilisha taarifa ya utekelezaji wa miradi ya barabara mkoa wa Iringa katika kikao cha bodi ya barabara  leo mjini Iringa

Mkuu  wa mkoa wa Iringa Dr Christine Ishengoma katikati akiongoza wajumbe wa bodi ya barabara mkoa wa Iringa kumkumbuka mbunge wa jimbo la Kalenga Dr Wiliam Mgimwa ,kulia ni mkuu wa wilaya ya Iringa Dr Leticia Warioba na kushoto katibu tawala wa mkoa wa Iringa Wamoja Ayub ambae anategemea kuapishwa rasmi  kesho Ikulu 

Wajumbe wa bodi ya barabara  mkoa wa Iringa  wakimkumbuka aliyekuwa mbunge wa jimbo la Kalenga Dr Wiliam Mgimwa

Wajumbe  wakiwa katika kikao  hicho leo

Watenda kazi  wa ofisi ya Tanroads mkoa  wa Iringa  wakiwajibika  ndani ya ukumbi

WAKATI  kasi  ya  vitendo  vya  rushwa katika maeneo ya  mizani nchini ikiendelea  kuchukua kasi  kubwa wakala  wa barabara  mkoa  wa Iringa (TANROADS )    wameanza kupambana na watumishi  wanaojihusisha na  vitendo vya  kuomba na kupokea  rushwa katika maeneo  ya mizani kwa kufunga kamera  maalum aina ya CCTV katika mzani wa Wenda kwenye barabara kuu ya Iringa - Mbeya.

Akizungumza mkakati  huo leo katika kikao cha bodi ya barabara  kilichofanyika katika  ukumbi  wa  Siasa ni Kilimo meje wa Tanroads mkoa  wa Iringa Paul Lyakurwa alisema  kuwa hatua ya  ofisi yake  kufunga kamera   hizo maalum ni kutaka kukomesha  vitendo vya  rushwa katika eneo hilo la mizani pia kuepusha uharibifu  wa barabara unaotokana na baadhi ya watendaji  wa ofisi yake wasio waaminifu ambao wamekuwa wakipokea rushwa na kuacha magari yenye mizigo mizito kupita .

Hivyo  alisema kupitia kamera  hizo ambazo  zimefungwa kila kona  za eneo hilo la mizani TANROADS itaweza  kuwakamata  wafanyakazi  wanaoomba  rushwa katika eneo hilo na kuwachukulia hatua kali za kisheria.

Meneja  huyo alisema  kuwa moja kati ya malalamiko makubwa kwa ofisi yake katika eneo hilo la mizani ni kutokana na kukithiri kwa vitendo  vya rushwa kutoka kwa baadhi ya  watumishi  wasio waadilifu  kujinufaisha  kwa kuomba na kupokea  rushwa .

" Kumekuwepo na malalamiko  sana kutoka kwa wadau wa usafiri  kuwa eneo hilo linajihusisha kwa rushwa hivyo  sasa tayari  tumeanza kufunga kamera  maalum zitakazosaidia kuwabana  watumishi  wanaoomba na kupokea  rushwa na tayari mafundi  wanaendelea na kazi  hiyo ya kumalizia  kufunga kamera hizo"

Pia  meneja  huyo wa TANROADS alisema kuwa  mkoa  wa Iringa  umeendelea  kutekeleza ahadi za Rais Jakaya  Kikwete   kwenye ilani ya uchaguzi mkuu mwaka 2010 kwa kutekeleza ujenzi wa barabara za mji wa Mafinga kilometa 2 kwa kiwango  cha lami ,ujenzi  wa barabara ya Sokoni na Msikitini yenye urefu wa Km 1.6 huku TAMISEMI ikiahidi  kutenga fedha   kukamilisha Km 0.4 zilizobaki.

Aidha  ujenzi wa barabara  ya  Ipogolo- Kilolo yenye urefu wa Km 35 ambayo kazi ya usanifu  wa barabara  yote ilikamilika  mwaka wa fedha 2008/09 na kuwa kiasi cha  km 5.8 zimejengwa na Km 1.5 zitajengwa mwaka  wa  fefha 2013/2014  kwa  kazi hiyo kuendelea .

 Kuhusu  ujenzi wa Km 12.5 za barabara za kalenga ambazo  zipo katika ahadi ya Rais Kikwete  amesema ujenzi  huo umekamilika  wakati akisi cha Tsh milioni 635 zilitengwa  mwaka wa fedha 2013/14 kuendelea  ujenzi wa km 1.0 na kuwa ahadi  zinatekelezeka  sambamba na ahadi ya ujenzi wa barabara ya Iringa hadi hifadhi ya Taifa ya Ruaha  yenye urefu wa Km 104 kwa kiwango cha lami.

Lyakurwa  alisema kuwa pia  zoezi la kuimarisha  miundo  mbinu ya barabara  za jimbo la Isimani unaendelea  kwa barabara  za Izazi- Pawaga- Mowa yenye  urefu  wa Km 83 imepangwa  kufanyiwa upembezi yakinifu  na  usanifu kwa ajili ya ujenzi wa kiwango cha lami ambapo  fedha iliyotengwa  mwaka 2013 /14 ni Tsh milioni 112

Wakati  ahadi ya  Rais  Kikwete ya  mwaka  2010 ya  kuimarisha miundo  mbinu ya barabara  jimbo la Ismani  mhandisi  mwelekezi M/s Engineering Research  Associate  toka jijini Dar es Salaam  ameshapatikana  kwa gharama ya Tsh milioni 172 ambae atafanya kazi kwqa miezi sita na kazi  hiyo inatarajiwa kuanza wakati  wowote baada ya  kukamilika kwa taratibu za mkakaba.

Kwa  upande wake   mkuu  wa mkoa wa Iringa Dr Christine Ishengoma mbali yakupongeza hatua ya TANROADS  kuweka kamera  hizo  za kupambana na watumishi  wala rushwa bado  alisema kuwa kuna haja ya ofisi hiyo ya TANROADS kuwabana  wenye malori makubwa ambayo yameendelea  kupita katika mji wa Iringa katika barabara ya Iringa- Dodoma barabara ambayo hata  hivyo bado  kukamilika .

Kwani  alisema  kuwa  mbali ya serikali kuendelea na ujenzi wa barabara  hiyo ya Iringa- Dodoma ambayo bado kukabidhiwa  ila bado kuna idadi kubwa ya malori yenye mizigo mizito kuendelea kupita katika barabara  hiyo hali ambayo inaweza kusababisha madhara makubwa kwa uhai wa barabara  hiyo .

Hivyo alitaka  uongozi wa TANROADS mkoa wa Iringa  kuweka  zuio kwa  wenye malori  kuendelea  kuitumia barabara  hiyo ya Iringa -Dodoma kwa  sasa kabla ya  kukabidhiwa rasimi .

Kuhusu malalamiko ya  madereva katika maeneo ya mizani kwa mizani  kutoa majibu tofauti kwa uzito wa magari  ,mkuu  huyo wa mkoa alitaka  kujua sababu ambazo  zinapelekea  mizani  hiyo kuwa na majibu  tofauti ambapo gari  lililopimwa mzani A na kjukutwa na uzito  stahiki  bado akipima eneo jingine mzigo  huo huo unaonekana umezidi uzito.

katika hatua nyingine mkuu  huyo wa mkoa aliwataka madiwani  wa Halmashauri ya Manispaa ya Iringa kuachana na siasa  zaidi na badala yake kusaidia  kunusuru uhai wa barabara katika  eneo la Ndiuka ambalo  linaongoza kwa  uharibifu wa barabara kwa watu kuoshea magari barabarani .

Alitaka  siasa iende sambamba na maendeleo na katika masuala ya maendeleo ya Taifa ni vema   madiwani hao kuachana na siasa na kusimamia maendeleo kwa faida ya wananchi wanaowatumikia .

Pia  mkuu  huyo wa mkoa alipiga marufuku madereva  wa magari  wanatumia barabara za mkoa wa Iringa kuachana mara  moja na tabia ya  kutumia matawi  ya miti  kama alama  ya pembe tatu  pindi  magari  yao yanapoharibika njiani.

Alisema mbali ya suala  hilo kuongeza uchafuzi wa mazingira  ila bado matumizi mabaya ya alama za barabarani  yanachangia  uchafuzi wa mito ambayo inatumika kwa matumizi ya binadamu   pia.

Wakati  huo  huo  mwakilishi wa mstahiki meya  wa Halmashauri ya Manispaa ya Iringa Victor Mushi ambae ni diwani wa kata ya Mtwivila na mwenyekiti wa chama cha makandarasi mkoa  wa Iringa alimtaka meneja wa TANROADS mkoa  wa Iringa  kufika katika eneo la bwawa la Kihesa Kilolo na kuangalia kama bwawa  hilo lina faida ama halina faida katika  eneo hilo na kama lina faida  basi kuliwekea mikakati ya  kuliboresha na kama halina faida  kukaushwa kabisa  eneo hilo kutokana na kuongezeka kwa vifo  vya wananchi wanaotumbukia katika bwawa  hilo.