BADO WAKINAMAMA WAJAWAZITO WANAKUMBANA NA CHANGAMOTO .

                     Mwandishi Kenneth John   Dar

Imebainika  kuwa  tatizo  la  upatikanaji  wa  huduma  bora  za  afya,  hususani  kwa  kinamama  wajawazito  bado  haziridhishi  kutokana  na  uchache  wa  vifaa  vya  kujifungulia  pamoja  na  baadhi  ya    wahudumu  wa  afya  (wakunga)  kutokuwa  na  lugha  nzuri  kwa  kinamama  hao.

Wakizungumza  na  mtandao  wa  www,matukiodaima.com , kwa  nyakati  tofauti  wakazi  wa  jiji  la  Dar  es  salaam  wamesema  kuwa  ukiachana  na  changamoto  ya  uchache  wa   vifaa  na  vitanda  kwa  baadhi  ya  hospitali  pia  kinamama  wamekuwa  wakikumbana  na  kauli   za  kejeli  na  matusi  kutoka  kwa  baadhi  ya  wakunga  swala  ambalo  linaongeza  uchungu  zaidi  katika  uzazi.

Annasemba  Mhamba  ni  miongoni  mwa   waliozungumza  na  mtandao   huu  na  kusema  kuwa  baadhi ya  wakunga  wengi   hujisahau  na  mara  nyingine  hawajali  kabisa  wagonjwa  swala  ambalo  ni  hatari.

“Wakati  mzazi  amefikia  ule  muda  wa  kujifungua,lakini  unakuta  wahudumu  wa  afya  hawapo  karibu  na  wewe ,hivyo  unakuta  mtu  amejifungua  kabla  hata  wakunga  hawajafika”Alisema  Annasemba  kwa  hisia.

Aidha  naye  Mama  Nyemo  ambaye  ni  mkazi  wa  Mbagala  Chalambe  jijini  humo,  alisema  kuwa,  shida  kubwa  iliopo  katika  maeneo  mengi  ni  suala  la  uwingi   wa  watu  ambao  hauwiani na  idadi  ya  vituo  vya  afya  au  hospitali,jambo   linalosababisha  huduma  za  afya  kuwa  chini  zaidi.

“Kwa  mfano  kama  sisi  maeneo  ya  Temeke, watu  ni  wengi  sana  na  hospitali  ambayo  wanaitegemea  zaidi  kwa  maeneo   ya  mbagala  ni  hospitali  ya  Zakiem,unakuta  wamama  wanatoka  Mkulanga  na  maeneo   mengine  wote  wanakwenda  Zakiem,Sasa   pale  wanapofika  Zakiem  huduma  wanapata  lakini  sehemu  ya  kulala  wagonjwa  ndio  inakuwa  ndogo”Alisema  Mama  Nyemo.

Naye  Rose Elibariki  Ntiliya,  ambaye  ni  muuguzi    mkunga  katika  hospitali  ya  Dar  Group,    akijibu  kuhusiana  na  taaluma  yao  kutuhumiwa  na   watu  wengi  kwa   kutowajali  kinamama  wajawazito,  alikiri  kuwepo  kwa  baadhi  ya  wauguzi  wakunga  wenye   kutoa  maneno  machafu  kwa  kinamama  wajawazito, Ingawaje  alisema  swala  hilo  katika  hospitali  yao   haliko  kabisa  na  wala  hajawahi kusikia  mtu  akilalamikia  kuhusu  lugha  chafu.

Rose  aliwataka   wauguzi  wenye  tabia  hiyo  kuacha,  kwani  si  maadili  na  si  hivyo  walivyofunzwa  darasani  hata  katika  taaluma  zao .

“Kinachotakiwa  hao  wauguzi  kubadili  tabia  zao   hizi  za  kuwatukana  kinamam,a  hasa  walio leba  katika  hali  ya  uchungu,na  kuwasaidia  kwa  hali   ya   unyenyekevu  na  hekima,  kwa  kufuata  maadili  waliyofundishwa  na  kuwasaidia   mpaka  mwisho  wa   siku  mama  ajifungue  salama”Alisema  Rose.

Sambamba  na  hayo   muuguzi  Rose  aliwataka   kinamama  kujenga  tabia  ya  kuhudhuria  kliniki,  ili  waweze  kupata  mafunzo  na  maelezo  jinsi  ya  kuweza  kujifungua  salama  na  kujua  afya  zao  pamoja  na  mtoto  aliye  tumboni,  na  hata    waume  zao  pia,jambo  ambalo  litasaidia  kuwafanya  kujua  ni  jinsi  gani  watamlea  mtoto  wao.

Vile  vile  wakazi  hao  walitoa  wito  kwa  serikali   na  mamlaka  husika,  kuhakikisha  zinaongeza  nguvu  zaidi  katika  swala  la  uzazi,  ili  kufanya   uzazi  kutokuwa  jambo  hatari  miongoni  mwa  wanajamii.