MADEREVA BODA BODA SASA KUBANWA.

Mwandishi  , Kenneth John wa  ,Dar 

Jeshi  la  polisi  kanda  maalum  Dar  es  salaam  limetangaza  kuanza  rasmi  mpango  wa  kupunguza  ajali  za  pikipiki  barabarani,  kwa  kuhakikisha  madereva  wote  wa  bodaboda    wanafuata  sheria  na  taratibu  za  kutumia  vyombo  hivyo.

Akizungumza  na  waandishi  wa  habari  jijini  Dar  es  salaam,  kamishina  wa  polisi  kanda  maalum  ya  Dar  es  salaam  CP  Suleiman  Kova  alisema  kuwa  uamuzi  huo  umekuja  baada  ya  kufanya  uchunguzi,  na  kugundua  ajali  nyingi  za  bodaboda  zinatokana  madereva  wengi  wa  piki  piki  kutokuwa  na  elimu  ya  usalama  barabarani,pia  baadhi  yao  hawafuati  sheria  ikiwa  ni  pamoja   na  kuvaa  kofia  ngumu   pindi  wanapotumia  vyombo  hivyo.

Aidha  kamanda  Kova  alibainisha  sifa  ambazo  mtumiaji  wa  piki  piki  atatakiwa  kuwa  nazo  kila  atumiapo  chombo  hicho,  ambazo  ni  pamoja  na  kuvaa  kofia  ngumu  dereva  pamoja  na  abiria  wake,kutopakia  abiria  zaidi  ya  mmoja  maarufu  kama  mshikaki,kuwa  na  leseni  ya  kuendeshea  piki  piki  , na   pia  mtumiaji    atatakiwa    kuwa   na  bima  itakayomsaidia  endapo  atapata  ajali.Pamoja  na  hayo  Kova  aliendelea  kusema   kuwa  sifa  nyinginezo  ni  lazima  piki  piki  iwe  na  sifa  za  kutembea  barabarani.

“Boda  boda  lazima  zifuate  sheria  na  taratibu  za  nchi  kwani  bila  ya  hivyo  mwisho  wa  siku  hilo  ni  bomu,sisi  hatukatai  wao  kufanya  kazi,  kazi wafanye  ila  wafuate  sheria  sheria”Alisisitiza  kamanda  Kova.

Vile  vile  kamanda  Kova  amesema  kuwa  kuanzia  sasa  ni   marufuku   kwa  boda boda  kupaki  piki piki  mbele  ya  benki   au  karibu  na  benki,   kwani  jambo  hilo  linahatarisha  usalama  wa  taasisi  hizo  za  kifedha,  na  kuwaomba  halmashauri  wa  jiji  la  Dar  es  salaam  kuwasaidia  kuainisha  maegesho  maalum  kwa  ajili  ya  piki  piki.

Na  katika  hatua  nyingine  jeshi  la  polisi  kanda  maalum  limefanikiwa  kumkamata  mtuhumiwa  Grace  Adrew  Chapanga  (34),  ambaye  ni  mama  wa  nyumbani ,mkazi  wa  Bunju  “B”  jijini  Dar  es  salaam  kwa  kosa  la  wizi  wa  mtoto  mchanga  wa  kike , mwenye  umri  wa  mwezi  mmoja  aitwaye  Veis  Venus  aliyeibwa  Desemba  27 ,2013  maeneo  ya  mwenge  jijini  Dar  es  salaam.

Taarifa  zinasema  kuwa  mtuhumiwa  alitenda  kosa  baada  ya  kumhadaa  mama  wa  mtoto   aitwaye  Salma  Frank  (29)  , mkazi  wa  kawe  Mji  mpya   kwa  kumwomba  ambebe  huku  wote  wakiwa   abiria  wa  daladala  wakitokea  hospitali  ya  mwananyamala .

 Lakini  walipofika  Mwenge  kituo  cha  daladala  mtuhumiwa  aliteremka  upesi  na  kutoweka  na  mtoto,pindi  mwenye  mtoto  akikusanya  vitu  vingine  alivyokuwa  navyo.

Mtuhumiwa  huyo  alitenda  kosa  hilo  kwa  kushirikiana  na  Halima  Haufi  Alabi,  (46) , mkazi  wa  Boko   maliasili  ambaye  naye  alikamatwa  januari  4,2014.Watuhumiwa  wote  wawili  baada  ya  kutenda  kosa  hilo  waliondoka na  kuelekea  Sumbawanga   mkoani  Rukwa , ambapo  Grace  Adrew  Chapanga  alimdanganya  mumewe  kuwa  yeye  ni  mjamzito  na  angependa   kwenda  kujifungulia  nyumbani  kwao  huko  Sumbawanga.

Aidha  upelelezi  wa  tukio  hilo   ulifanikiwa  kumkamata  mume  wa  Grace  Adrew   Chapanga  aitwaye   Daniel  James  Mwaikambo  (38),  ambaye  ni  mkazi  wa  bunju  “B”  na  ni  mfanyakazi  wa   uhamiaji  makao  makuu  Dar  es  salaam,  na  ndipo  wakaenda  naye  hadi  Sumbawanga  ambapo  walimkuta  mtuhumiwa  na  kumkamata

Awali  taarifa  zinasema  kuwa , tangu  wafunge  ndoa  mwaka  2010 , wawili  hao  hawajabahatika  kupata  mtoto.

 Lakini  mnamo  mwaka  2012  Grace  Adrew  Chapanga  alifanyiwa  upasuaji  wa  uvimbe  tumboni  ,ambapo  Daktari  alimwambia  hatoweza  kushika  mimba  tena  jambo  ambalo  Grace  hakumweleza  mume  wake , wala  ndugu  yake  yoyote , hadi  alipopanga  njama  na  hatimaye  kufanikiwa  kumuiba  mtoto  huyo.

Hata  hivyo  taarifa  ya  jeshi  la  polis  kanda   maalum  inasema  kuwa,   upelelezi  juu  ya  tukio  hili  unaendelea  kwa  kufuatilia  uchunguzi  wa  vinasaba  (DNA)  vya  mama  mzazi  na  mtoto   aliyeibwa.Pia  mtoto  amekabidhiwa  kwa   mama  yake  mzazi.