MIGOGORO YA WALIMU NA SERIKALI NI VYEMA IFANYIWE KAZI KUOKOA ELIMU YETU NCHINI.

Rais wa   chama cha walimu  Tanzania(CWT)Gratian  Mukoba  alipokuwa akizungumza na waandishi  wa  habari  Feb 7 na  miongoni mwa  mambo  aliyozungumzia  ni pamoja na kero  na  madai ya  walimu kwa serikal

.................................................................................

 mwandishi  Kenneth  John wa  matukiodaima.com

Suala  la  elimu  ni  jambo  nyeti  sana  kwa  nchi  yoyote  inayohitaji  maendeleo  katika  Nyanja  mbalimbali    za   kiuchumi,  kijamii, kisiasa  na  kibiashara , kwani  nchi   yenye  nguvu  kazi  ya  watu  wenye  elimu  nzuri   na  ya  kutosha   ya  ya  fani  mbalimbali,  ni  rahisi  pia  kwa  nchi  husuka    kupiga   hatua  ya  kimaendelea.

Lakini  ni  dhahiri   kuwa  siku  za  hivi  karibuni  elimu  imekuwa  ikishuka  kwa  kasi  na  huku  fani  ya  ualimu  ikizidi  kushuka  thamani,  kutokana  na  sababu  mbalimbali  ikiwemo   masuala  ya  mazingira  duni  ya    kufanyia   kazi  kwa  walimu   kuanzia  makazi  ya  kuishi  na  vitendea   kazi  pamoja  na  mishahara   hafifu    inayoliliwa  na  kundi  kubwa  la  wadau  wa  elimu  mara  kwa  mara   nchini.

Kwasasa  si  jambo  la  kushangaza  kumsikia  mzazi  au  mlezi  akimweleza  kijana   wake  kuwa  endapo  akifeli   katika  mitihani  yake  atampeleka  kusomea  ualimu,  na  mara  nyingine  utawasikia   hata  vijana  wenyewe  wakiwa  katika     maongezi  yao  wakisema  kuwa  mimi  ni  kifeli  tu  nitaenda kujisomea  ualimu  ili  nijishikize,  hivyo  fani  hii  inaonekana  kama  ni   fani  ya  watu  walioshindwa   na  kukata  tamaa.

Februari  7  mwaka  huu  Chama  cha  walimu  Tanzania  kupitia  Rais  wa   chama  hicho  Mwl  Gratian   Mukoba,  alikutana  na  vyombo  vya  habari  na   alibainisha  mambo  kadhaa  ambayo  yamekuwa  yakiendelea   kati    ya  serikali  na  walimu  nchini, mambo   ambayo  kwa  namna  moja  au  nyingine  ukiyaangalia  kwa  umakini   yanaweza  kuwa  yanachangia  kudhorotesha  elimu  yetu   nchini,Miongoni  mwa  mambo  hayo  ni  pamoja  na   suala  la  mishahara   duni  na  hafifu,   suala  ambalo    Mukoba  katika  taarifa  yake  kwa  wanahabari   alibainisha  kwamba  kumekuwa  na  vikao  mbalimbali   vya  majadiliano  ya   nyongeza  ya  mishahara  kwa  walimu    kutokana  na  maagizo  ya  mahakama  kuu  ya  Division   ya  kazi   ya  mwaka  2012,Ingwaje  pamoja   na  vikao  hivyo  bado  kumekuwa   hakuna  chochote  kilichopatikana  na  badala  yake  serikali  ilitoa  ahadi  na  kuwaahidi  kuwa  ifikapo  februari  mwaka  huu    majadiliano  juu  ya  masuala  ya  kuhusu  nyongeza  za    mishahara  yatakuwa   yamekamilika.

Halikadharika  serikali  na  walimu  wamekuwa  katika  mikwaruzano   kuhusiana , na  ulipwaji  wa  malimbikizo   ya   madeni  ya  mishahara   na  yasiyo  ya  mishahara, ambapo  kwa  mujibu   wa   taarifa  ya  februari  7  mwaka  huu  kutoka  (CWT)  ilibainisha  kuwa  madai  ya  walimu   kwa  serikali   yanayohusiana  na  malimbikizo  ya  mishahara  yanafikia   shilingi  Bilioni  40.  Sasa  ukitathimini  utagundua  hali  hii  imekuwa  ni  miongoni  mwa  sababu  inayowakatisha  tamaa   walimu  ya  kufundisha  kwa  moyo,  na  hivyo  kupelekea  viwango  vya  elimu  kuzidi   kushuka  zaidi  nchini.

Pamoja   na  sababu  hizo  lakini  pia  suala  la  upandishwaji  wa  madaraja  kwa  walimu  limekuwa  ni  suala   linalokatisha  tamaa  ya  kujiendeleza   kielimu  kwa  baadhi  ya   walimu ,ambapo  (CWT)   katika  taarifa  yake  ilionekana  kuitupia    lawama  serikali   kwa  kushindwa  kufanya  maandalizi   mazuri  ya  mfumo  wa  upandishwaji  wa  vyeo  kwa  walimu   yaani   (OPRAS).

Hivyo  kutokana na  changamoto na  kero  hizo  za  walimu,  ni  dhahiri  zimekuwa  zikiongeza  kusababisha  kushuka  kwa  viwango   vya  elimu   nchini,kwani  walimu  wamekuwa  na  changamoto  nyingi  mno, ni  ukweli  kwamba  endapo  mazingira   ya  kazi  na  malipo  yangekuwa  yakilipwa  kwa  wakati  husika,  na  uboreshwaji  wa  viwango  vya  mishahara  ungefanyika  kwa  vyovyote  vile  walimu   wangezidi  kujituma  kufanya  kazi  yao  ya  kuelimisha  watoto  wa  kitanzania  vizuri .

 Hivyo  ni  vyema  serikali  ikajaribu  kuzitazama  changamoto  hizo  za   walimu  kwa  undani  zaidi,  na  kuzitafutia   ufumbuzi  wa  haraka   ili  kuhakikisha  tunaokoa  elimu  yetu   inayozidi  kushuka  siku  hadi  siku. 

Na  ikumbukwe  kwamba     mara  ya  mwisho  Chama  cha  walimu  Tanzania  (CWT)  kilipokutana  na  vyombo  mbalimbali  vya  habari  nchini,  kilitoa  msimamo  kuwa  endapo  itafika  mwisho  mwa  mwezi  februari  hawajapata  ufumbuzi  wa  kero  mbalimbali   zinazowakabilia  basi   watakuwa   tayari   kutangaza    mgogoro  na  serikali,Hivyo  ni  vyema  kabla  ya  kufikia  huko,  serikali  ikaangalia  namna  ya  kutatua  kero  hizo  kwani  waungwana  husema  “Usipoziba  ufa  utajenga  ukuta”  hivyo  ni  bora  kushughulikia  mapema  kero  walizonazo  walimu   kwa  sasa  kabla   ya  mgogoro  huo  kutangazwa   mwishoni  mwa  mwezi  huu ambao  unaweza  kupelekea  madhara  makubwa  zaidi  katika  sekta   ya  elimu  nchini