SIRI NZITO YAFICHUKA JUU YA KUWEPO KWA NJAMA ZA KUWATEKA KATIBU NA MWENYEKITI WA CCM IRINGA

Vijana waliojiunga na CCM ikiwa ni matokeo ya kutelekezwa na uongozi wa Chadema baada ya kukamatwa kwa kusababisha vurugu kwenye mikutano ya CCM

KAMPENI za uchaguzi mdogo wa ubunge jimbo la Kalenga wilayani Iringa zimeingia katika sura mpya baada ya Chama cha Mapinduzi (CCM) kudai kuwepo kwa njama kutoka kwa wapinzani wao za kuwateka nyara baadhi ya viongozi wake.

Kaimu Katibu wa CCM Mkoa wa Iringa, Hassana Mtenga aliyasema hayo kwenye kampeni za kumnadi mgombea wao Godfrey Mgimwa zilifanyika juzi katika kijiji cha Mseke.

Mtenga alisema “Taarifa za uhakika kutoka ndani ya moja ya vikao vyao vya wafuasi wa Chadema vilivyofanyika hivikaribuni mjini Iringa, kulikuwepo na hoja ya yeye na Mwenyekiti wa CCM Mkoa wa Iringa, Jesca Msambatavangu kutekwa ili kudhohofisha kampeni,” alisema.

Alisema taarifa za uhakika walizopata kutoka kwa wafuasi wao walioko ndani ya chama hicho zinaonesha kuwepo na kundi la vijana zaidi ya 50 kutoka mikoa mbalimbali nchini waliokuja wilayani Iringa kwa kazi maalumu.

Akiwahusisha vijana hao na baadhi ya matukio ya uhalifu, Mtenga aliwataja majina na namba zao za simu huku akiwaomba Polisi kulifanyia kazi suala hilo.

Hata hivyo alisema CCM imejipanga kikamilifu kukabiliana na vurugu zozote watakazofanyiwa na wapinzani wao hao.

“Ikitoke mfuasi wetu au mwanachama wetu amefanyiwa chochote kile na kundi hilo la Chadema, nawaambia huo ndio unaweza kuwa mwisho wa kampeni za Chadema katika jimbo hili,” alisema.

Alisema mwanaCCM au mwananchi yoyote atakayefanyiwa fujo na wafuasi hao wa Chadema atoe taaarifa kwa viongozi wa kata ili hatua dhidi yao ziweze kuchukuliwa mara moja.

Akizungumzia vuguvugu la mabadiliko maarufu kama M4Cs, Mwenyekiti wa CCM Mkoa wa Iringa alisema mabadiliko hayo yanalenga kuwatoa watanzania kutoka kwenye amani kwenda kwenye machafuko.

Alisema machafuko yakakapoanza, watakaopata madhara ya haraka ni watanzania wa kawaida kwasababu  familia za wanaoyahamasisha hazitakuwepo.

“Pale Iringa Mjini tuna mbunge wa upinzani, muulizeni kama watoto wake huwa anawatanguliza kwenye maandamano wanayoitisha mara kwa mara; haijawahi kutokea na haitatokea, mtakaotangulizwa mbele ni nyie,” alisema.

Akitoa mfano wa vurugu zilizotokea wilayani Kilolo wakati wa uchaguzi mdogo wa udiwani kata ya Ukumbi, alisema vijana watatu waliokuwa wafuasi wa Chadema walikamatwa na baada ya kukamatwa hawakupata msaada wowote kutoka kwa viongozi wa chama hicho.

“Tulikamatwa katika vurugu tulizopanga kuzifanya katika ya Ukumbi, lakini hatukupata msaada baada ya kufikishwa Polisi; aliyetusaidia chai na chakula tukiwa mahabusu ni huyu huyu Mwenyekiti wa CCM Mkoa,” alisema mmoja wao Filbert Kisumbo.

Kisumbo alisema baada ya kuachiwa, hakuna kiongozi wa Chadema aliyekuwa tayari kuwasaidia nauli ya kurudi makwao na ndipo walipoenda kumuangukia Mwenyekiti wa CCM kwa mara nyingine tena ili wasaidiwe.

“Hatukuwa na neno la ziada la shukrani zaidi ya kumwambia hatuna sababu ya kuendelea kuwa wana Chadema; kama kwenye shida kila mmoja na lwake na kwenye raha wanaofaidi ni wakubwa, tukaona ni bora tujiunge CCM,” alisema na kuwataja wenzake kuwa ni Steven Mkimbo na Daudi Mwenda.