MAN UNITED KUKUTANA NA OLYMPIAKOS KATIKA KLABU BINGWA ULAYA LEO

Manchester United wataingia dimbani usiku wa leo kuchuana na Olympiakos huku walinzi wake wawili Phil Jones na Jonny Evans wakishindwa kucheza kutokana na kuwa majeruhi.

Mashetani Wekundu hao kutoka Old Trafford pia watamkosa kiungo wake mahiri Luis Nani ambae nae ni majeruhi wakati Rafael na Danny Welbeck wote wakitokea majeruhi wamejiunga na kikosi cha timu hiyo tayari kupambana na mabingwa hao wa Ugiriki.  Safu ya ushambuliaji ya Man United inatarajiwa kuongozwa na Wayne Rooney na Robin van Persie huku kiungo Juan Mata aliyesajiliwa hivi karibuni akishindwa kucheza kutokana na kuzuiwa na kanuni za UEFA kwa kuwa tayari alishiriki michuano ya msimu huu akiwa na timu yake ya zamani, Chelsea.

Olympiakos nao watamkosa mfumania nyavu wao Javier Saviola aliye majeruhi. Hivyo safu ya ushambuliaji wa timu hiyo itaongozwa na Mnaijeriaa, Michael Olaitan (21).

Japokuwa hali bado ndivyo sivyo kwa timu ya Olympiakos kwani Nelson Valdez aliyesajiliwa wakati wa dirisha dogo Januari haileweki kama atakuwa tayari kucheza au la, kocha wa timu hiyo Michael amesema mchezaji huyo yupo lakini hakuelezea iwapo atampanga ama la alipoulizwa kuhusu uimara wa mchezaji huyo anayetokea Paraguay.

Olympiakos, mabingwa wa soka nchini Ugiriki watakutana na mabingwa kutoka Uingereza, Manchester United katika uwanja wa Karaiskakis jijini Athens, leo usiku majira ya saa 4.45 kwa saa za Afrika Mashariki.

Michezo itakayochezwa leo usiku katika klabu bingwa ulaya