MOYES KUBAKI MAN UNITED? UVUMI MZITO WAZAGAA KUNG’OKA KWAKE!

UVUMI mkubwa umezagaa kwamba kuna tamko litatolewa kwenye Soko la Hisa la New York linalohusu David Moyes kuondoka Manchester United baada ya Jumanne Usku kufungwa Bao 2-0 na Olympiacos huko Ugiriki kwenye Mechi ya Kwanza ya Raundi ya Mtoano ya Timu 16 ya UEFA CHAMPIONZ LIGI lakini habari hizo zimepuuzwa huko Manchester.

Uvumi huo, ambao pia ulikuwepo kwenye Mitandao ya Kijamii, umeishangaza Klabu ya Manchester ambayo Siku zote imesisitiza kuwa Meneja wao atapewa muda wa kutosha kujenga Timu yake.

Hilo la kujenga Timu upya lilionekana wazi kwenye Mechi ya Jana na Olympiacos ambao licha ya kuzidiwa kumiliki Mpira wao ndio walifunga Bao 2 kupitia Alejandro Dominguez na Joel Campbell.

Mwenyewe Moyes amekiri uchezaji mbovu wa Timu yake na amesema: “Huwezi kumchagua hata Mchezaji mmoja ambae angalau alicheza vizuri. Hatukucheza kabisa!”

Nae Robin van Persie, akiongea na Kituo cha Habari cha Holland, NOS, alisema: “Inabidi tufanye kazi. Kuna Gemu nyingie tunacheza vizuri na nyingine hatuchezi vizuri!. Wakati mwingine tunakosa bahati!”

Licha ya kuongoza kwa Bao mawili ambayo watatua nayo Old Trafford hapo Machi 19 kwa ajili ya Mechi ya Marudiano, Mchezaji wa Arsenal, Joel Campbell, ambae yupo kwa Mkopo Olympiacos, amepuuza hilo na kudai kazi bado ipo.

Campbell, ambae ni Raia wa Costa Rica na aliejiunga na Arsenal Mwaka 2011 na kutolewa kwa Mkopo, vile vile amepuuza habari kuwa Bao lake kwenye Mechi hiyo na Man United litamrudisha Arsenal kwa kusema: “Lile ni Goli muhimu kwangu na Olympiacos. Siifikirii Arsenal, naijali Olympiacos tu!”