WATU 129 WAMEPOTEZA MAISHA KATIKA AJALI MKOANI SINGIDA

                  MWAKA JANA

Kamanda wa Jeshi la Polisi mkoa wa Singida, SACP, Geofrey Kamwela akitoa taarifa za matukio ya ajali kwa mwaka 2013 kwa mwakilishi wa MOblog mkoani Singida.

Na Nathaniel Limu, Singida

JUMLA ya ajali 246 zimetokea mkoani Singida kwa kipindi cha mwaka jana na kati yake 116 zilisababisha vifo vya watu 129.

Hayo yamesemwa hivi karibuni na Kamanda wa Jeshi la Polisi mkoa wa Singida, SACP, Geofrey Kamwela wakati akitoa taarifa yake ya hali ya uhalifu mkoani humo kwa kipindi cha kuanzia Januari hadi Desemba mwaka jana (2013),

Amesema idadi hiyo ya ajali ni ongezeko la matukio mawili ambayo ni sawa na asilimia 0.8 ikilinganishwa na ajali zilizotokea mwaka juzi (2012).

Aidha, Kamwela amesema katika ajali za mwaka jana,watu wapatao 299 walijeruhiwa ambapo idadi hiyo ni pungufu kwa asilimia 15,ikilinganishwa na majeruhi 353 kwa kipinid cha mwaka juzi.

 “Katika kipindi hicho,makosa madogo madogo 22,584 yaliripotiwa ambapo watu 20,127 walikamatwa na kutozwa tozo ya zaidi ya shilingi 684.9.Kiasi hicho ni ongezeko la shilingi 185.1 sawa na aslimia 37,ikilinganishwa na kipindi kama hicho kwa mwaka juzi”,amesema.

Kuhusu makosa ya jinai,Kamwela amesema jumla ya makosa ya jinai 11,101 yaliripotiwa na kati yake makosa makubwa yalikuwa 1,358 na madogo 9,743.

 “Mwaka juzi makosa ya jinai yalikuwa 12,042 yaliripotiwa, na makubwa yalikuwa 1,337 wakati  madogo yalikuwa 10,705.Makosa hayo yakilinganishwa na ya mwaka jana (2013),kuna upungufu wa makosa 941 ambayo ni sawa na aslimia 7.8”,amesema.

Wakati huo huo,Kamanda Kamwela amesema katika makosa ya kuwania mali,jumla ya mali yenye thamansi ya zaidi ya shilingi 707.8,zillibwa na mali yenye thamani ya zaidi ya shilingi 231.2 iliokolewa.

Amesema jumla ya watu 577 walifikishwa mahakamani na kupewa adhabu za vifungo au kulipa faini mbalimbali.