LIGI KUU ENGLAND MECHI ZI TAKAZO CHEZWA LEO MWAKA MPYA 2014 JANUARI MOSI

MVUTO OLD TRAFFORD: MAN UNITED v SPURS, SAA 2.30 USIKU!

MWAKA MPYA 2014 unaanza Januari Mosi   England kwa Klabu zote 20 za Ligi Kuu kushuka dimbani ikianza Mechi ya Swansea City na Manchester City na kufuatia Mechi 8 zitakazoanza Saa 12 Jioni na Siku kufungwa kwa kimbembe cha Old Trafford kati ya Mabingwa Manchester United na Tottenham.

Man United wako Nafasi ya 6, Pointi sawa na Tottenham, wote wakiwa na Pointi 34 ikiwa ni Pointi 8 nyuma ya Vinara Arsenal lakini ni Pointi 2 tu nyuma ya Timu ya 5 Liverpool ambao nao wako Pointi 1 nyuma ya Everton walio Nafasi ya 4.

Wakati Timu zote, Man United na Spurs, zikiwa zimeanza Msimu vibaya kwa Man United kufungwa Mechi 5 kati ya 15 za kwanza za Ligi na Tottenham kumtimua Meneja wao Andre Villas-Boas, hivi karibuni Timu hizo zimeanza kufanya vizuri.

Man United wameshinda Mechi zao 6 zilizopita katika Mashindano yote wakati Tottenham, chini ya Meneja mpya Tim Sherwood, ambae hutumia Mfumo wa 4-4-2, hawajafungwa Mechi ya Ligi tangu atwae himaya Wiki mbili zilizopita.

Kwenye Mechi hii, Man United wanatarajiwa kuwa nae Wayne Rooney ambae aliikosa Mechi Jumamosi waliyowafunga Norwich City Bao 1-0 baada kupona maumivu ya Nyonga lakini huenda wakamkosa Robin van Persie, ambae, licha ya kupona majeruhi yake na kuanza Mazoezi, huenda akawa si fiti kwa Mechi baada kuwa nje Mwezi mzima.

Katika Mechi ya kwanza ya Ligi Msimu huu iliyochezwa White Hart Lane, Spurs na Man United zilitoka 2-2 lakini mara ya mwisho kukutana Old Trafford, Tottenham walishinda Bao 3-2 hapo Septemba 2012 hiyo ikiwa ni mara yao ya kwanza kushinda Uwanjani hapo tangu Mwaka 1989.

Nao Liverpool, ambao Siku ya Krismasi walikuwa kileleni na baada kuchapwa mfululizo na Man City na Chelsea, sasa wako Nafasi ya 5, wataikaribisha Hul City Uwanjani Anfield na huenda hii ndio Mechi yao ya kufuta machungu yao ya kuchapwa Mechi mbili mfululizo.

Lakini katika Mechi yao ya kwanza ya Ligi kati yao, Mwezi mmoja uliopita, Hull City iliitandika Liverpool Bao 3-1.

Everton walitumia kipigo cha Liverpool toka kwa Chelsea na kutua Nafasi ya 4 baada ya kushinda Uwanjani kwao Goodison Park walipoipiga Southampton 2-1 na safari hii wanasafiri kwenda kucheza na Stoke City ambayo imefungwa mara moja tu Nyumbani kwao Msimu huu.

Arsenal, ambao wamemaliza Mwaka 2013 kwa kuwa kileleni mwa Ligi baada kuitungua Newcastle Bao 1-0 huko St James Park, Jumatano watakuwa Nyumbani Emirates kuivaa Cardiff City ambao hawana Meneja baada kumtimua Malky Mackay hivi Juzi.

Lakini, ingawa Arsenal wako kileleni, nyuma yao kwa Pointi 1 wapo Man City na Chelsea wako Pointi 1 nyuma ya City.

Chelsea, ambao Jumapili waliitwanga Liverpool 2-1 Uwanjani Stamford Bridge, watakuwa Ugenini kucheza na Southampton.

Man City wanaweza, kwa muda, kukwaa kilele cha Ligi Siku hii ya Mwaka mpya kwani Mechi yao ya Ugenini na Swansea City ndio ya kwanza kabisa kwa Mwaka 2014.

RATIBA MECHI ZIJAZO:

[Saa za Bongo]

Jumatano Januari 1

1545 Swansea v Man City

1800 Arsenal v Cardiff

1800 Crystal Palace v Norwich

1800 Fulham v West Ham

1800 Liverpool v Hull

1800 Southampton v Chelsea

1800 Stoke v Everton

1800 Sunderland v Aston Villa

1800 West Brom v Newcastle

2030 Man United v Tottenham