HII NDIO RATIBA NA UTARTIBU WA MAZISHI YA HAYATI NELSON MANDELA

 

Johannesburg. Kamati ya Maandalizi ya Mazishi ya Kiongozi wa Wazalendo wa Afrika Kusini,Nelson Mandela imeanza kupanga utaratibu wa mapokezi ya wageni mashuhuri watakaohudhuria mazishi ya kiongozi huyo nchini Afrika Kusini.

Mandela alifariki nyumbani kwake kwenye Mji wa Houghton, Johannesburg, Alhamisi usiku. Alifariki akiwa na umri wa miaka 95.

Taarifa za jimbo zilizotolewa jana zilisema kuwa, Uwanja wa Ndege wa Mthatha ulioko Eastern Cape utakuwa maalumu kwa wageni mashuhuri zaidi watakaofika kwenye shughuli ya mazishi ya Nelson Mandela.

“Watu hao mashuhuri zaidi, watapakizwa kwa pamoja kwenye magari maalumu ya kifahari kupelekwa Qunu kuepuka vurugu katika Barabara Kuu za N2,” alisema Noxolo Kiviet ambaye ni kiongozi wa jimbo katika taarifa yake.

Watu mashuhuri wa kati na watu wa kawaida watatumia Uwanja wa Ndege wa Port Elizabeth na Uwanja wa Ndege wa East London.

Taarifa iliyotolewa jana ilieleza pia kuwa,shughuli za kumuaga zitafanyika kwenye Uwanja wa FNB mjini Johannesburg kesho kama ilivyopangwa na baadaye mwili wake kupelekwa Qunu kwa taratibu nyingine kabla ya mazishi Jumapili ijayo.

Kiviet alisema,jimbo lake linajiandaa kupokea maelfu ya waombolezaji katika kipindi cha wiki moja.

“Shirika la Umeme,Eskom wametueleza kuwa wamerekebisha upatikanaji wa umeme tangu Septemba na kuna mipango ya dharura imewekwa endapo itatokea umeme kukatika.”

Alisema,benki, maduka na mashirika ya hisani yameongeza wafanyakazi na wamekuwa wakarimu kuwasaidia wale wote watakaokwama.

“Nimewaomba wananchi wa Eastern Cape kuwasaidia kuwapa malazi wageni wote watakaokwenda kwa maziko.”

Kiviet alisema, watu hawataruhusiwa kufika katika baadhi ya maeneo na watatakiwa kuangalia katika maeneo yaliyotengwa kuanzia Johannesburg hadi kwenye mazishi.

Mbali na hayo, baadhi ya maeneo yamekwishatengwa kwa ajili ya kuaga ambayo ni; OR Tambo, Nelson Mandela Bay, Buffalo City, Chris Hani, Queenstown, Joe Gqabi, Cacadu, Alfred Nzo na Wilaya ya Amathole.