MKUU WA MKOA WA IRINGA ATAKA BIDHAA KUTOPANDISWA BEI

 

MKUU wa Mkoa (RC) wa Iringa, Dk. Christine Ishengoma

MKUU wa Mkoa (RC) wa Iringa, Dk. Christine Ishengoma, amewataka wafanyabiashara mkoani hapa kuacha kupandisha bei ya vyakula katika kipindi hiki cha Sikukuu ya Krismasi na Mwaka Mpya, na kwamba watakaokiuka watachukuliwa hatua kali za kisheria.

Dk. Ishengoma alitoa kauli hiyo alipokuwa akitoa salamu za Krismasi na kuwatakia heri ya Mwaka Mpya wakazi wa Mkoa wa Iringa.

Akizungumza na waandishi wa habari ofisini jana, mkuu huyo wa mkoa aliwataka wakurugenzi  wa halmashauri  zote za wilaya kuanza kuzunguka mitaani  kuchunguza  bei ya  bidhaa na  kuwachukulia hatua wote  wanaopandisha bei kiholela.

Alisema imekuwa ni kawaida kwa baadhi ya wafanyabiashara kutumia sikukuu mbalimbali kujipatia fedha kwa kuwanyonya wananchi, jambo ambalo katika mkoa huo halitavumiliwa.

Dk. Ishengoma alisema lengo la  serikali ya mkoa kuwabana  wafanyabiashara ni kutaka kuona  wananchi  wanasherehekea  sikukuu  hizo na kununua vyakula na vitu  mbalimbali kulingana na bajeti  waliyoitenga.

Alieleza serikali ya mkoa haitakubali  kuona wananchi wakiibiwa kwa kuuziwa vyakula kwa bei kubwa na kuwaomba wananchi kutoa ushirikiano katika suala hilo.

Pamoja na hayo, alivipongeza vyombo vya  habari  mkoani Iringa kwa mchango  mkubwa  wa kuhamasisha maendeleo na kutaka kuonyesha  ushirikiano katika wakati huu wa sikukuu kwa kufanya uchunguzi wa  wafanyabiashara wanaopandisha bei.