WALIOGOMA KURUDIA KDATO CHA 2 KUKIONA

SERIKALI imewataka wazazi kuhakikisha wanafunzi wote 36,000 waliofeli kidato cha pili mwaka jana na kutakiwa kurudia darasa hilo wanafanya hivyo vinginevyo hawataruhusiwa kufanya mtihani wa kidato nne mwakani. Tahadhari hiyo ilitolewa hivi karibuni na Naibu Waziri wa Elimu na Mafunzo ya Ufundi, Philipo Mulugo, wakati akifungua mafunzo ya Waratibu Elimu kata Kitaifa yaliyoendeshwa na Wakala wa Maendeleo ya Uongozi wa Elimu (ADEM) wilayani Bagamoyo, Pwani. Mulugo alisema kuna taarifa ya kuwepo kwa baadhi ya wanafunzi hao kushawishiwa na wakuu wa shule pamoja na wazazi wao kuendelea na kidato cha tatu kwa matumaini ya kuwa watafanya mitihani ya kumaliza kidato cha nne mwakani, jambo aliloeleza kuwa halitawezekana. Aliwaagiza Waratibu Elimu Kata nchini kufanya utaratibu wa kufuatilia mara moja wanafunzi wote wa kidao cha pili waliofeli kama wamekariri darasa hilo kama ilivyoagizwa na wizara na endapo watawabaini waliokaidi watoe taarifa mapema, ili hatua za kisheria zichukuliwe. Awali, Ofisa Taaluma wa Mkoa wa Dar es Salaam, Benadeta Thomas, alisema mafunzo hayo yanaendeshwa katika mikoa 11 nchini na ni utekelezaji wa mpango wa maendeleo ya elimu ya sekondari ngazi za kata na kwamba mikoa inayohusika ni Dar es Salaam, Mbeya, Morogoro, Mtwara, Kilimanjaro, Singida, Ruvuma, Arusha, Tabora, Mwanza na Tabora na Julieth Mkireri, Bagamoyo TANZANIA DAIMA