MZEE AKAMTWA KWA KUJINJA MBWA

 

Mzee afumaniwa akichinja mbwa  nchini kenya

 

MZEE mwenye umri wa miaka sabini anazuiliwa katika kituo cha polisi cha Kimilili akisubiri kufikishwa mahakamani, baada ya kufumaniwa na wananchi akichinja mbwa.

Akithibitisha kisa hicho kinara wa polisi wa Kimilili Philip Wambugu alisema kuwa Samwel Ng’ang’a alifumaniwa nyumbani kwake akimchinja mbwa wake ambaye amekuwa akimfuga kwa muda wa miezi mitatu.

Hii ni baada ya polisi kupashwa habari kutoka kwa mmoja wa majirani wa mzee huyo, ambaye hakutaka jina lake litajwe, ya kuwa mzee huyo alikuwa amejifungia ndani ya chumba chake akimtoa ngozi mbwa huyo.

Wambugu aliongeza kuwa mzee huyo atafanyiwa uchunguzi wa kimatibabu kutathmini hali yake ya kiakili kabla ya kufikishwa mahakamani.

Juhudi za KNA za kutaka kujua ni nini hasa kilichomfanya mzee huyo kufanya kitendo hicho zilifichua kuwa mzee huyo anaugua ugonjwa wa kifafa jambo ambalo anasema kuwa alipania kulifanya baada ya kumtembelea mganga akitafuta suluhu ya ugonjwa huo na hivyo anafuata maagizo ya mganga huyo.

Naye afisa mkuu wa wanyama katika eneo hilo, Joseph Ganda alisema kuwa mbwa hayupo kati ya orodha ya wanyama wanaoliwa na binadamu na ni hatia kwa mzee huyo kutekeleza kitendo hicho.

Mzee huyo sasa atashtakiwa kulingana na sheria za wanyama. 

chanzo swahilihub.com