PINDA KUTOA VYETI VYA KUZALIWA MBEYA

WAZIRI Mkuu Mizengo Pinda, anatarajia kuwa mgeni rasmi katika uzinduzi wa kampeni ya kuwapatia wananchi vyeti vya kuzaliwa kupitia ofisi za kata wanazoishi badala ya ofisi za makatibu tawala wa wilaya. Uzinduzi huo utafanyika katika viwanja vya CCM Ilomba, jijini Mbeya kesho. Taarifa kutoka serikalini zinaeleza mpango huo utasimamiwa na Wakala wa Vizazi na Vifo (Rita) ambao watasimamia shughuli hizo za usajili. Kwa upande wa wilaya ya Mbeya Vijijini, Tanzania Daima ilizungumza na Ofisa Mtendaji wa Kata ya Utengule Usongwe, John Mwanampazi, aliyesema wamepata mafunzo ya kuandaa vyeti hivyo ambavyo mwananchi atapata siku hiyohiyo kwa sh 7,000. “Ni kweli zoezi hili litazinduliwa Julai 23 ambapo wananchi hawatalazimika kwenda ofisi za wilaya bali watakuja katika ofisi zetu za kata na vituo vya afya na watapatiwa vyeti vyao siku hiyohiyo tofuti na sasa,’’ alisema Mwanampazi.Alisema watoto wote wenye miaka mitano, watapatiwa vyeti hivyo bure, lakini waliozidi watatoa sh 7,000 na kutakiwa kuwa na viambatanisho kadhaa ikiwemo picha moja ndogo. Alivitaja vitu ambavyo mtu aliyezidi miaka mitano atatakiwa kuwa navyo ili kupata cheti cha kuzaliwa ni tangazo la kuzaliwa mtoto, kadi ya kliniki ya mwombaji, hati ya kusafiria kutoka uhamiaji, cheti cha ubatizo, cheti cha kumaliza shule ya msingi, cheti cha kumaliza kidato cha nne au cha sita, kitambulisho cha kupiga kura au barua ya ofisa mtendaji wa mtaa. Alisema vyeti hivyo humsaidia mtoto kuandikishwa shule, kuzuia ajira ya watoto na utumiaji wa watoto katika vita, kuwawezesha wanafunzi kujiunga na vyuo na elimu za juu na kupata mikopo ya elimu ya juu. “Faida zingine ni lazima ili kupata ajira katika sekta za serikali, majeshi ya ulinzi na usalama, ni kiambatanisho cha msingi ili kupata kitambulisho cha taifa katika zoezi linaloendelea nchini na pia husaidia kupata hati ya kusafiria (passport),’’ alisema Mwanampazi. na Gordon Kalulunga   Tanzania daima gazeti