KIDONGO CHEKUNDU SPORTS PARK KULETA MAPINDUZI SOKA LETU?

....KITUO KUANZA KUJENGWA MWEZI UJAO!

....WAFANYAO VYEMA KWENDA SUNDERLAND ACADEMY OF LIGHT!!

HABARI za uteuzi wa Kocha wa zamani wa Azam FC, Stewart Hall, kuwa Meneja wa Kituo kipya cha Kidongo Chekundu Sports Park pamoja na Elite Football Academy, zote za Mjini Dar es Salaam, zimeleta matumaini makubwa kwa Soka la Tanzania.

Kituo cha Kidongo Chekundu Sports Park kitaendeshwa kwa pamoja na Symbion Power, Wazalishaji wakubwa wa Umeme Nchini, Klabu ya Sunderland ya England na Wizara ya Habari, Vijana, Utamaduni na Michezo.

Matumaini haya makubwa yalitangazwa Juzi na Mtendaji Mkuu wa Symbion Power Tanzania, Peter Gathercole, ambae alisema kuwa Mradi huo utatoa fursa kwa Vijana ambao watafundishwa mbinu za kiufundi, kiakili na kuwajenga kimwili ili wafanikiwe katika Soka la sasa.

Gathercole pia alitoboa kuwa wale Vijana watakaofanya vyema kwenye Kituo hicho watapelekwa kwenye Chuo cha Soka cha Klabu ya Sunderland huko England kiitwacho Sunderland Academy of Light.

Kituo cha Kidongo Chekundu Sports Park, ambacho Umma utaruhusiwa kukitumia, kitakuwa na Uwanja mkubwa wa Soka wenye Majani ya Bandia pamoja na Taa za kuchezea Usiku na pia vitakuwepo Viwanja vidogo vitano ili kukidhi Marika ya Vijana wa Umri mbalimbali.

Pia, Kituo hicho kitakuwa na Vyumba vya Kubadili Jezi, Zahanati yenye zana zote na Mgahawa.

Ujenzi wa Kituo hiki utaanza Mwezi ujao.

Mkuu huyo wa Symbion Power, Peter Gathercole, amesema uteuzi wa Stewart Hall ni hatua muhimu katika azma yao wao, Sunderland na Serikali katika kuleta maendeleo kwa Vijana.

Stewart Hall, ambae ana Leseni ya Ukocha ya UEFA ngazi ya Pro pamoja na Ukufunzi, aliondoka kuwa Kocha wa Azam FC Wiki iliyopita na kabla ya hapo aliwahi kuwa Kocha wa Timu ya Taifa ya Zanzibar.

Huko nyuma, Hall aliwahi kuwa Mkufunzi kwenye Chuo cha Soka cha Klabu ya England, Birmingham City, Kocha wa Timu ya Taifa ya Visiwa vya Saint Vincent and the Grenadines pamoja na Klabu ya India, Pune FC.

Wakikaribisha hatua hii ya uteuzi wa Hall, Mtendaji Mkuu wa Klabu ya Sunderland, Margaret Byrne, alituma salaam za furaha na kuunga mkono kitu ambacho pia kilifanywa na Waziri Fenella Mukangara wa Wizara ya Habari, Vijana, Utamaduni na Michezo.

Mwezi Juni, Rais wa Tanzania Jakaya Kikwete, pamoja na Waziri Fenella Mukangara walitembelea Sunderland Academy of Light ambako waliunga mkono juhudi za Klabu hiyo na Symbion Power katika kuendeleza Vijana kupitia Soka.