MAN UNITED SASA YAWAGEUKIA JANMAAT NA VERMAELEN!

MANCHESTER UNITED wako mbio kumsaini Beki wa Netherlands Daryl Janmaat na pia tayari wameshaafikiana nae Nahodha wa Arsenal Thomas Vermaelen.

Katika Siku mbili zilizopita Man United walifanikiwa kuwasaini Kiungo Ander Herrera kutoka Athletic Club Bilbao na Fulbeki wa Southampton, Chipukizi Luke Shaw.

Daryl Janmaat, Miaka 24, ni Fulbeki wa Feyenoord ambayo aliichezea Mechi 30 Msimu uliopita na kuisaidia kutwaa Nafasi ya Pili kwenye Ligi Eredivisie.

Hivi sasa Janmaat yuko huko Brazil na Kikosi cha Netherlands chini ya Kocha Louis van Gaal ambae ndie Kocha mpya wa Man United.

Huko Brazil, Janmaat ameichezea Netherlands Mechi zao zote 3 za Kundi B na kung’ara.

Ingawa pia anasakwa na Klabu za Tottenham na Napoli, Janmaat anaelekea atamfuata Louis van Gaal.

Wakati huo huo, habari toka London zimedai kuwa Nahodha wa Arsenal Thomas Vermaelen ameshafikia makubaliano na Man United kuhusu maslahi yake binafsi akisaini Old Trafford na kinachochelewesha Uhamisho wake ni mvutano wa Dau la Uhamisho kati ya Arsenal na Man United.

Awali Man United ilitoa Ofa ya Pauni Milioni 6 lakini zilikataliwa na Arsenal ambao wanataka Pauni Milioni 12.

Hata hivyo zipo dalili dili hii itakamilika karibuni na Mchezaji huyo wa Kimataifa wa Belgium kutinga Old Trafford.