UEFA YAIPUNGUZIA MAN CITY ADHABU ZA FFP:

 

MABINGWA wa England Manchester City sasa watatakiwa kutaja Wachezaji Watano badala ya 8 wa Nyumbani katika Kikosi chao cha Wachezaji 21 kilichopunguzwa na UEFA kwa ajili ya UEFA CHAMPIONZ LIGI ikiwa ni Adhabu yao kwa kukiuka Masharti ya FFP.

Mwezi Mei, Man City waliadhibiwa na UEFA kwa kupigwa Faini na Kikosi chao cha Ulaya kupunguzwa kuwa Wachezaji 21 tu huku kati yao wakitakiwa 8 kuwa wale ‘Waliokuzwa Nyumbani’ baada ya kuvunja Sheria za FFP zinazotaka Klabu kujiendesha kwa Faida kutokana na Mapato yao wenyewe.

Hata hivyo, baada ya FIFPro, Chama cha Kutetea Haki za Wachezaji wa Kulipwa, kuikabili FIFA na kuitaka isiadhibu Wachezaji badala ya Klabu, UEFA imelegeza Adhabu.

Katibu Mkuu wa UEFA, Gianni Infantino, amesema: "Hili limekuja baada ya ombi la FIFPro ambao walisema Adhabu zinaadhibu Wachezaji wenye Mikataba badala ya Klabu!””

FFP-NI NINI?

-Ni Financial Fair Play

-UEFA ilianzisha Club Financial Control Body (CFCB) Juni 2012 ili kudhibiti Klabu kutotumia Fedha zaidi ya Mapato yao wenyewe.

- Kanuni za FFP zitaanza kikamilifu Msimu ujao, 2014/15, ingawa Klabu zilitakiwa kuzifuata kwa Miaka miwili sasa na ndio maana ManCity imekumbwa na Adhabu.

Infantino alisema kwa sababu hiyo ndio maana wameamua kupunguza idadi ya Wachezaji ‘Waliokuzwa Nyumbani’ iwe na uwiano sawa na Kikosi cha Man City kilichopunguzwa.

Mbali ya kupunguziwa Kikosi chao cha Ulaya, City pia walidungwa Faini ya Pauni Milioni 49 huku Milioni 32 ikisimamishwa na pia kutakiwa kutumia Pauni Milioni 49 tu kununua Wachezaji na hii ikijumuisha Fedha zozote watakazopata wakiiuza Wachezaji.

Pia, Fungu la Mshahara wa Wachezaji wao limetakiwa libaki vile vile kama ilivyokuwa Msimu wa 2013/14.

Msimu wa 2013/14, City kwenye UEFA CHAMPIONZ LIGI walisajili Wachezaji 23, 8 wakiwa Wachezaji ‘Waliokuzwa Nyumbani’, na kuwatumia 21 kati ya hao.

Katika hao 8, Kipa Joe Hart, Jack Rodwell, lGael Clichy na Dedryck Boyata walikuwemo.

Tafsiri ya UEFA ya Wachezaji ‘Waliokuzwa Nyumbani’ haijali Uraia ili mradi Mchezaji husika awe amefundishwa na Klabu hiyo au nyingine, zote zikiwa chini ya Chama kimoja cha Mpira cha Nchi hiyo, kwa muda usiopungua Miaka Mitatu wakati Mchezaji akiwa na Umri kati ya Miaka 15 na 21.