BUNGE LETU ;MBATIA ASEMA WATUNZI WA VITABU LAZIMA WASHTAKIWE

SIKU moja baada ya kufichua udhaifu uliopo katika vitabu vya elimu ya msingi nchini, mbunge wa kuteuliwa, James Mbatia (NCCR-Mageuzi), ameitaka serikali kuwashtaki wahusika kama wahujumu uchumi.

 

Pia ametaka mamlaka husika kusimamisha mchakato wa kuvisambaza vitabu hivyo ili kutoa nafasi ya utayarishaji wa vingine vyenye ubora unaostahili.

Akizungumza na waandishi wa habari jana mjini hapa, Mbatia ambaye pia ni Mwenyekiti wa Taifa wa NCCR-Mageuzi, alisema vitabu hivyo havina ubora unaostahili na hivyo kuruhusu visambazwe ni kuwalisha watoto sumu.

Huku akionyesha machapisho ya vitabu tofauti, Mbatia alisema udhaifu wa vitabu hivyo unatokana na mambo makuu matano ambayo ni sera ya elimu ya mwaka 1995 iliyotumika katika utayarishaji wake kuwa dhaifu.

Vitabu vimetayarishwa bila ya kutumia mitaala, mihtasari ya mwaka 2005 iliyotumika katika utayarishaji kuwa mibovu, taratibu za kitaifa na kimataifa za utayarishaji kutofuatwa.

Mbatia alisema kuwa serikali ina ndimi mbili kama nyoka katika sakata hilo na kwamba juzi Waziri Shukuru Kawambwa na naibu wake, Philipo Mulugo, walijibu suala hilo kisiasa ili kujiokoa bungeni.

Mbunge huyo aliyeambatana na wabunge wenzake, David Kafulila wa Kigoma Kusini na Felix Mkosamali wa Mhambwe, aliongeza kuwa serikali inajikanganya kwa kusema wamebaini makosa hayo wanayoyaita madogo lakini wanakubali kuivunja EMAC.

Alisema taratibu za utayarishaji wa vitabu ni wa hovyo kwani kuna vitabu visivyo na mwandishi, jina la mwandishi ni kampuni ya uchapishaji.

Katika mtiririko huo wa udhaifu wa vitabu hivyo na mihtasari, Mbatia alinukuu mitaala ya elimu ya msingi na awali akisema ule wa msingi umeandika kuwa elimu hiyo ni kwa ajili ya mwanafunzi kuweza kupata uelewa wa lugha ya Kifaransa itakayomwezesha kupata ajira.

Na kwa elimu ya awali mtaala unasema ni kumwezesha mwanafunzi kukua kiuchumi, kisiasa na kijamii.

Alisema kuwa kwa udhaifu huo, kamwe hawawezi kukubali fedha hiyo itumike kuangamiza taifa kwa kusambaza vitabu hivyo ambavyo ni sawa na kuwalisha watoto sumu.

Akichangia hotuba ya bajeti ya wizara ya elimu juzi, Mbatia alionyesha vitabu kadhaa bungeni huku akitaja makosa mengi yaliyomo na kuhoji viliidhinishwaje na EMAC.

Mbatia alitoa mfano wa kitabu cha Jiografia cha darasa la sita ambacho kimekosewa kwa kuandikwa Jografia.

Vitabu vingine ni cha hisabati cha darasa la nne katika ukarasa wa 49, ambapo kimeandikwa sifuri gawanya kwa sifuri jibu lake ni sifuri wakati jibu sahihi ni haiwezekani.

Pia alisema kitabu cha hisabati kingine kinaonyesha 2x7=15 na kitabu cha Uraia pia kinaeleza Mtaa kuwa unaundwa na vitongoji mbalimbali na kuongozwa na wenyeviti wa vitongoji.

CHANZO: TANZANIA DAIMA