TANZANIA INAUPUNGUFU WA WAHANDISI 76,000

Mkurugenzi wa Mafunzo ya Shahada za Awali za Umahiri, Profesa Allen Mushi (wa pili kulia) akimsikiliza mwanafunzi wa mwaka wa tatu Shule ya uhandisi wa ujenzi wa Chuo Kikuu Kishiriki (COET-UDSM), Alice Titus kwenye maonyesho ya kazi mbalimbali za chuo hicho katika kuadhimisha miaka 40 tangu kuanzisha kwake. 

     Picha naVenance Nestory 

 

 

Wakati Serikali ikianza kutekeleza mpango wake wa Matokeo Makubwa Sasa (BRN) ambao unalenga kukuza uchumi na kuboresha maisha ya wananchi wake, imebainika kuwa Tanzania ina upungufu wa waandisi 76,000.

Akizungumza hivi karibuni, Chuo Kikuu cha Dar es Salaam, kwenye hafla ya kuadhimisha miaka 40 tangu kuanzishwa kwa fani hiyo nchini, Profesa Burton Mwamila ambaye ni miongoni mwa wanafunzi wa kwanza kuhitimu uhandisi hapa nchini, anasema mwaka 1973 walidahiliwa wanafunzi 60, lakini hivi sasa chuo hicho kinapokea wanafunzi 600 ambao ni idadi ndogo ikilinganishwa na mahitaji yaliyopo hivi sasa.

“Taifa linapokuwa na wanafunzi wa uhandisi 600 wanaohitimu masomo kwa mwaka kati ya watu milioni 45 ni kidogo sana,” anasema.

Anasema ili kwenda sambamba na kasi ya maendeleo iliyopo hivi sasa, Tanzania inahitaji waandisi 88,000, lakini waliopo ni 12,000 pekee.

Mwamila ambaye pia ni Makamu Mkuu wa Chuo Kikuu cha Nelson Mandela cha Sayansi na Teknolojia, anasema kwamba wahandisi wanapokuwa wachache hawawezi kufanyakazi kwa umakini kwa sababu wanalazimika kufanya kazi nyingi, jambo linalowapunguzia ufanisi katika kusimamia miradi wanayopewa.

“Kuna wakati mtalazimika kumtumia technian badala ya mhandisi, tena wakati mwingine mtamtumia mhandisi kama technician kwasababu hata wao hawatoshi,” anasema.

Kuhusu mpango wa Serikali wa Matokeo Makubwa Sasa; Mwamila anasema ni muhimu kuwa na mipango ya maendeleo, lakini anachokiona ni kuwa nchi za nje ndizo zitakazotoa mchango mkubwa katika kuisaidia Tanzania kufikia malengo yake.

Ili nchi ifanikiwe kuendesha miradi mikubwa ya maendeleo bila kutegemea misaada kutoka nje ya nchi, unahitajika mpango maalumu utakaowezesha udahili wanafunzi wengi wa uhandisi.

Hata hivyo, anasema kwamba njia sahihi ya kufanikiwa kwenye mpango wa BRN ni kuwa na Watanzania watakaoweza kuuendeleza mpango huo katika kufikia malengo yaliyokusudiwa.

Walipotoka

Wanafunzi wa kwanza wa uhandisi Chuo Kikuu cha Dar es Salaam, walidahiliwa mwaka 1973 wakiwa 60 ambapo hadi sasa wamebaki 48 baada ya 12 kufariki dunia.

Wataalamu hao ambao wengi wao wanasifika kwa kusimamia miradi mikubwa ya maendeleo hapa nchini, wanasema kitivo cha uhandisi katika Chuo Kikuu cha Dar es Salaam kilianzishwa kwa msaada wa Serikali ya Ujerumani na kwamba hata walimu wake wengi walikuwa ni kutoka nchini Ujerumani 

Chanzo Na Goodluck Eliona, Mwananchi gazeti

  Novemba16  2013  saa 11:33 AM