IBRAHIMOVIC:ASEMA ‘MIMI NI BORA, SIHITAJI Ballon d'Or!'

HUKU Cristiano Ronaldo akiibuka kuwa ndio anaetegemewa kutwaa Tuzo ya Mchezaji Bora Duniani, Ballon d'Or, Staa wa Sweden, Zlatan Ibrahimovic, ameibuka na kudai yeye ni bora na hivyo hahitaji Ballon d'Or.

Ibrahimovic, ambae Msimu uliopita aliisaidia Klabu yake PSG kutwaa Ubingwa wa Ligue 1 huko France, aliwaambia Wanahabari hapo Jana: “Sihitaji Ballon d'Or ili kujua mimi ni bora. Hiyo ni muhimu kwa Wachezaji wengine.”

Jumatano, Ibrahimovic alifunga Bao lake la 39 kwenye UCL, UEFA CHAMPIONZ LIGI, wakati PSG inaifunga Olympiakos 2-1 Uwanjani Parc des Princes na kushinda Nafasi ya Kwanza ya Kundi lao na pia kufuzu kuingia Raundi ya Mtoano ya Timu 16 wakiwa na Mechi moja mkononi.

Haijapata kutokea Mchezaji kutoka Sweden akatwaa Tuzo ya Mchezaji Bora Duniani lakini hilo halimnyimi Ibrahimovic usingizi.

Amefafanua: “Si kitu ambacho ninakifikiria na si kitu muhimu kwangu!”

Mshindi wa Ballon d'Or atatangazwa hapo Januari 13.

Hivi sasa lengo la Ibrahimovic ni kuisaidia PSG kutetea tena Ubingwa wao ambapo Jumapili watakuwa Nyumbani kucheza na Olympique Lyon huku Klabu yake ikiwa ndio inaongoza Ligue 1 ikiwa na Pointi 34 kwa Mechi 14.