KOCHA MOYES ATAPATA MSAADA WA ALEX FERGUSON

>>ADAI: ‘MAN UNITED NI KLABU PEKEE INAWEZA KUWA BINGWA IKITOKA NYUMA!’

 

Sir Alex Ferguson amesisitiza David Moyes atapewa kila msaada unaohitajika ili afanikiwe kama Meneja wa Manchester United.

Ferguson alizungumza hayo Jana wakati akizindua Kitabu cha Maisha yake, ‘Alex Ferguson-My Autobiography’ wakati ambapo Man United, Mabingwa Watetezi, wapo Nafasi ya 8 kwenye Ligi Kuu England.

Meneja huyo wa zamani wa Man United ambae alistaafu Mwezi Mei na nafasi yake kuchukuliwa na David Moyes alietokea Everton, amekiri kuwa uzinduzi huo wa Kitabu chake haukuja wakati mzuri hasa kwa vile Moyes hivi sasa yuko kwenye darubini kali ya kumulika mwenendo wake huku Timu yake ikisuasua.

Lakini, Sir Alex Ferguson alisema ana uhakika mambo yatakwenda sawa na Man United ndio Klabu pekee inayoweza kutwaa Ubingwa ikitokea nyuma kwenye Msimamo wa Ligi.

Alisema: “Ni wazi mahojiano haya hayakuja wakati mwema na ndio maana nimeulizwa swali hilo.”

Alifafanua: “Nilipojiunga na Man United, nilipewa moyo na Matt Busby na alinisaidia sana. Nategemea kumsaidia David Moyes kwa namna hiyo hiyo!”

Moja ya mambo magumu yaliyomkabili David Moyes ni Ratiba ngumu katika Mechi za mwanzo wa Msimu ambapo katika Mechi za kwanza tano walipambana na Chelsea, Liverpool na Manchester City.

Ferguson amesema: “Nilipoona Ratiba ile hata mie ningepandisha. Ni mwanzo mgumu kwa Msimu. Lakini unajua, Manchester United ndio Klabu pekee inayoweza kushinda Ligi ikitoka nyuma. Mambo yakikaa sawa, kila kitu kitakuwa safi.”

Ferguson aliongeza: “David Moyes yuko kwenye mikono mizuri. Atapata msaada ule ule niliopata mimi. Upo mfumo mzuri wa kutoa msaada na atakuwa safi tu.”