KIKAO cha mashabiki wa timu ya Mbeya city Fc kutoka umoja wa matawi yote yaliyopo jijini mbeya na maeneo jirani wanatarajia kufanya kikao kesho jioni kwenye hotel ya Appleline, ikiwa ni maandalizi kuelekea mchezo ujao wa ligi kuu ya soka Tanzania bara dhidi ya Simba uliopangwa kuchezwa mwishoni mwa juma lijalo kwenye uwanja wa Sokoine.
Muda mfupi uliopita katibu mkuu wa umoja huo Thimoth Mwalongo amesema kuwa kikao hicho cha kesho licha ya kuwa na ajenda nyingi lakini kubwa zaidi itakuwa ni mikakati ya kuhakikisha City inaibuka na ushindi kwa mara nyingine mbele ya timu hiyo ya Msimbazi.
“Ni kikao muhimu, kwa sababu kitakuwa na mambo mengi ya kujadili na kujadiliwa lakini kubwa zaidi ni mikakati kuhakikisha tunawashikisha adabu Simba kwa mara nyingine, naomba mashabiki wenzangu wajitokeze kwa wingi ili tuweke mipango sawa tukiwa na nguvu moja kama ambavyo imekuwa kwenye nyakati zilizopita” alisema.
Akiendelea zaidi Katibu huyo wa umoja wa mashabiki aliweka wazi kuwa bado wanaimani kubwa na kikosi cha timu yao licha ya matokeo mabaya kwenye michezo kadhaa iliyopita na wanauhakika City itakuwa sehemu ya timu nne za juu kwenye msimamo wa ligi ya msimu huu.
“Ni kweli tumeanza vibaya lakini hatuna shaka, imani ya kila mmoja wetu hapa timu yetu itakuwa sehemu ya timu nne za juu mwisho wa msimu, tumekuwa na kawaida ya kuanza vibaya lakini tunamaliza vizuri ingawa mwaka huu kuna utoafauti kidogo kwenye kikosi hasa ukizingatia ugeni wa wachezaji wengi lakini imani kwa timu yetu ni kubwa sana” alimaliza.
