Mkurugenzi wa Uchaguzi akizungumzia kuahirishwa kwa Uchaguzi Kata ya Saranga na Jimbo la Kwela Sumbawanga

Tume ya Taifa ya Uchaguzi imeahirisha uchaguzi katika Kata ya Saranga iliyoko Halmashauri ya Manispaa ya Kinondoni kutokana na kuharibiwa kwa vifaa vya upigaji Kura ambavyo walikabidhiwa wasimamizi wasaidizi wa vituo wasio waaminifu. 

Mkurugenzi wa Uchaguzi Tume ya Taifa ya Uchaguzi Kailima Ramadhani aliwaambia waandishi wa habari ofisini kwake kuwa vituo 14 katika eneo la Stop over Kimara,vituo 8 katika eneo la IDP royal na kituo kimoja katika eneo la Mavurunza viliathirika na uharibifu huo wa vifaa hivyo havitaweza kupiga Kura. Aliongeza kuwa kuna vituo 8 katika kata ya Msigani ambavyo pia vililazimika kuahirisha uchaguzi kutokana na kuharibiwa kwa masanduku ya kupigia Kura kulikosababishwa na vurugu. 

Aidha katika Kata ya Milepa Halmashauri ya Wilaya ya Sumbawanga vituo 15 wapiga Kura walikataa kuendelea na Uchaguzi kutokana na vifaa kuchomwa moto zikiwemo karatasi za kupigia Kura pamoja na Masanduku ya Kura. Kwa minajili hiyo wapiga Kura katika maeneo hayo yote watalazimika Kupiga Kura kesho kumchagua Rais na baadae Tume itatoa maelekezo juu ya Uchaguzi wa Bunge Jimbo la Kwela na Udiwani katika kata ya Saranga.