WENGER ADAI MAN UNITED BADO WAMO MBIO ZA UBINGWA!

 WENGER: ‘WANAO WACHEZAJI WAKUBWA, UZOEFU MKUBWA NA NI KLABU KUBWA!’

MENEJA wa Arsenal Arsene Wenger amesema Mabingwa Manchester United bado wamo kwenye mbio za kuwania Ubingwa wa England licha ya kuwa Timu yake ipo kileleni mwa BPL, Ligi Kuu England, Pointi 8 mbele ya Man United.

Baada ya Mechi 8, Man United wapo Nafasi ya 8 na huu ni mwanzo mbovu kabisa kwao kwenye Ligi katika Miaka 24.

Wenger amesema: “Je Man United wako nje ya mbio za Ubingwa? Hapana, lakini ingekuwa Pointi 10 lingekuwa ni pengo kubwa kidogo!”

Aliongeza: “Wao wana Wachezaji wakubwa, wenye uzoefu mkubwa na ni Klabu kubwa!”

Juzi Jumamosi, Bao la Dakika ya 89 la Adam Lallana wa Southampton liliwanyima Man United ushindi walipotoka Sare 1-1 na Southampton kwenye Mechi ya Ligi iliyochezwa Uwanjani Old Trafford.

Siku hiyo hiyo, Arsenal waliitwanga Norwich City Bao 4-1 na kukaa kileleni wakiwa Pointi 2 mbele ya Chelsea.

Wenger ametamka: “Ukiwa na chaguo, utataka uwe kwenye mbio juu kileleni, lakini leo hii huwezi kuwaondoa Man United! Ni mapema mno! Ni gemu 3 tu na Msimamo unabadilika!”

Man United walianza Ligi kwa kuichapa Swansea Bao 4-1 na wametoka Sare mbili na Chelsea na Southampton kuzifunga Sunderland na Crystal Palace lakini wamefungwa na Liverpool, Manchester City na West Brom.